Opsioni i Ministrisë së Arsimit, që prindërit t’i blejnë vet tekstet shkollore për fëmijët, me mjetet financiare të siguruara nga shteti, po kritikohet nga shoqëria civile. Derisa i kërkohet ministrisë që të tërhiqet nga kjo ide, vlerësohet se do të ishte barrë për familjet si dhe do të krijonte vështirësi logjistike në gjetjen e librave.
Nga MAShTI po kërkohet që të bëjë zgjidhje të shpejtë për sigurimin e teksteve shkollore, në mënyrë që të mos humben ditë të mësimit të rregullt.
Kreu i Sindikatës së Bashkuar të Arsimit, Shkencës dhe Kulturës (SBAShK), Rrahman Jasharaj, e konsideron të dështuar ministren Arbërie Nagavci.
Sipas tij, MAShT-i nuk ka arritur të përgatitet me kohë për vitin shkollor.
Derisa thekson vendimin e SBASHK-ut për të mos mbajtur greva, Jasharaj thotë se vet Nagavci po i bën pengesë fillimit të vitit të ri shkollor.
Sipas Jasharajt, Nagavci është dashur të publikojë pasqyrën e çmimeve të teksteve shkollore të shtëpive botuese.
Edhe Dibran Hoxha nga Organizata për Rritjen e Cilësisë (ORCA), është shprehur kundër idesë së ministres Nagavci për tekstet shkollore. Sipas tij, kjo përgjegjësi është e ministrisë dhe jo qytetarëve.
Profesoresha Besa Luzha deklaron se ky opsion nga Ministria e Arsimit është në dëm të nxënësve. Sipas saj, nëse kjo ndodh atëherë fillimi i këtij vitit shkollor do të jetë mjaft problematik.
Ky paralajmërim nga Ministria e Arsimit që tekstet shkollore për fëmijët t’i blejnë prindërit, me mjetet e financuara nga shteti, nuk është pritur mirë as nga qytetarët. Sipas tyre është përgjegjësi e ministrisë që t’i sigurojë librat për nxënësit.
Ndërsa sekretari i Këshillit të Prindërve, Enver Balaj, tha për KosovaPress se nesër gjatë ditës, pas mbledhjes me Këshillin e Prindërve, do të dalin me një qëndrim lidhur me këtë çështje.
Gjithashtu, gjatë ditës së sotme, përfaqësues të shtëpive botuese kanë marrë pjesë në takimin e ftuar nga Ministria e Arsimit, Shkencës dhe Teknologjisë, por askush nuk është deklaruar për media.
Ministrja e Arsimit, Arbëria Nagavci, në një konferencë për media të hënën ka deklaruar se po e shqyrton mundësinë që këtë vit librat për nxënësit t’i blejnë prindërit, ndërsa mjetet financiare t’i transferojë ministria në xhirollogaritë e prindërve. /E.Krasniqi/
