Kur një pohim tingëllon tepër i mirë për të qenë i vërtetë, zakonisht edhe nuk është i tillë. Kjo shprehje proverbiale, e njohur pothuajse në të gjitha kulturat, përmbledh thelbin e debatit rreth statistikave që po përdoren në fushatën zgjedhore. Me afrimin e fundit të fushatës, kryeministri Albin Kurti ka intensifikuar deklaratat për arritjet e qeverisë së tij. Një nga pohimet kryesore është ai për krijimin e 85 mijë vendeve të reja të punës, të cilat ai i ka ilustruar si “gjashtë deri në shtatë stadiume ‘Fadil Vokrri’ të mbushura plot me njerëz”. Megjithatë, ky pretendim vihet në dyshim nga mënyra e llogaritjes së vendeve të punës. Formalizimi i punësimeve ekzistuese, angazhimet sezonale apo regjistrimet afatshkurtra në databaza zyrtare paraqiten si punësime të reja, ndonëse nuk pasqyrojnë domosdoshmërisht numrin real të të punësuarve aktivë. Referencë më e saktë për këtë, sipas njohësve të fushës, mbeten të dhënat e Trustit Pensional dhe llogaritë aktive kontribuese. Në anën tjetër, të dhënat zyrtare të EUROSTAT-it të Bashkimit Evropian tregojnë se gjatë periudhës së qeverisjes së Albin Kurtit, nga Kosova janë larguar mbi 210 mijë qytetarë, pa përfshirë shifrat e vitit 2025. Nëse përdoret e njëjta logjikë krahasimi, ky numër përkthehet në rreth 16 stadiume “Fadil Vokrri” të mbushura me njerëz që kanë emigruar drejt vendeve të Bashkimit Evropian. Ky kontrast paraqet një nga shembujt se si, sipas kritikëve, statistikat përdoren në mënyrë selektive dhe propagandistike. Një email i brendshëm qeveritar, i publikuar më herët nga portali “Demokracia.com”, kishte zbuluar se ministrive u ishte kërkuar të raportonin arritjet “me sa më shumë shifra”, për të forcuar narrativën politike. Sipas këtij qasjeje, numrat shndërrohen në mjet komunikimi politik, shpesh duke krahasuar elemente të pakrahasueshme. Një shembull tjetër është ai i investimeve në mbrojtje dhe armatim, ku rritjet përshkruhen si “qindfishim”, pa u sqaruar se transformimi i FSK-së në ushtri dhe plani dhjetëvjeçar i zhvillimit janë procese të miratuara me ligj që nga viti 2018. Kritikët vlerësojnë se këto deklarata janë pjesë e retorikës elektorale dhe se shifrat, të nxjerra jashtë kontekstit, shërbejnë më shumë për propagandë sesa për pasqyrim të saktë të realitetit socio-ekonomik në vend.
