Pas largimit nga Barcelona, Xavi Hernandez ka qëndruar për një kohë jashtë stolit të trajnerit, duke refuzuar disa oferta që, sipas burimeve pranë tij, nuk përputheshin me vizionin dhe objektivat e tij profesionalë.
Megjithatë, kjo periudhë pushimi mund të jetë drejt fundit. Mediat spanjolle raportojnë se Xavi është një nga kandidatët kryesorë për të marrë drejtimin e Ajax-it, klubit që ka fituar katër herë Ligën e Kampionëve.
Trajneri aktual i Ajax-it, Fred Grim, nuk ka bindur drejtuesit e klubit, pasi skuadra po mbetet pas objektivave të vendosura për këtë sezon. Ajax ndodhet në garë me Feyenoord për vendin e dytë në kampionat, që siguron kualifikim direkt në Champions League, ndërsa gara për titull konsiderohet pothuajse e mbyllur për shkak të epërsisë së madhe të PSV-së.
Një rol kyç në afrimin e mundshëm të Xavit mund të luajë Jordi Cruyff, i cili është emëruar së fundmi si Drejtor Teknik i Ajax-it. Sipas raportimeve, Xavi Hernandez është emri i parë në listën e kandidatëve për postin e trajnerit.
Bisedimet ende nuk janë konfirmuar zyrtarisht, por burimet bëjnë të ditur se palët janë të interesuara për të eksploruar mundësinë e një bashkëpunimi, që do ta kthente Xavin sërish në stolin e një ekipi të madh europian.
