Presidenti i Ukrainës, Volodymyr Zelensky, ka deklaruar se bisedimet tri-palëshe mes delegacioneve të Ukrainës, Rusisë dhe Shteteve të Bashkuara të Amerikës, të mbajtura në Abu-Dabi, kanë qenë konstruktive dhe të orientuara drejt gjetjes së një rruge për përfundimin e luftës.
Në një deklaratë të publikuar në rrjetin Telegram, Zelensky tha se diskutimet janë fokusuar në parametrat e mundshëm për përmbylljen e konfliktit, ndërsa ka shtuar se takime të tjera në këtë format mund të mbahen gjatë javës së ardhshme.
Ai bëri të ditur se përfaqësuesit ushtarakë të Ukrainës kanë përgatitur tashmë një listë çështjesh kyçe që pritet të diskutohen në takimet e ardhshme me përfaqësuesit e Rusisë dhe SHBA-së.
“Diskutimet u përqendruan kryesisht në parametrat e mundshëm për përfundimin e luftës. E vlerësoj faktin që ekziston një vetëdije për nevojën që Shtetet e Bashkuara të monitorojnë dhe mbikëqyrin procesin e përfundimit të luftës dhe garantimin e sigurisë reale,” tha Zelensky.
Sipas tij, pala amerikane ka ngritur gjithashtu çështjen e formateve të mundshme për miratimin e marrëveshjeve për përfundimin e luftës, si dhe rrethanat e sigurisë që do të ishin të nevojshme për zbatimin e tyre.
