Prokuroria Themelore në Mitrovicë ka njoftuar se ka urdhëruar Policinë që të intervistojë 43 kryesuesë të Qendrave Komunale të Numërimit, për shkak të dyshimeve për manipulim të numërimit me vota në zgjedhjet e 28 dhjetorit 2025.
Sipas komunikatës për media, bëhet fjalë për pesë komuna, Mitrovicë e Jugut, Mitrovicë e Veriut, Leposaviq, Zubin Potok dhe Zveçan, njofton Klankosova.tv.
“Prokuroria Themelore në Mitrovicë njofton opinionin publik se ka urdhëruar Hetimet Rajonale – Jug dhe Veri të Policisë së Kosovës, që të intervistohen dyzetë e tre (43) kryesues të Qendrave Komunale të Numërimit të Komunave Mitrovicë Jug, Mitrovicë Veri, Leposaviq, Zubin Potok dhe Zveçan, për shkak të dyshimeve për manipulim të numërimit me vota në zgjedhjet e 28 dhjetorit 2025 nëpër këto komuna. Prokuroria Themelore në Mitrovicë dhe Policia e Kosovës mbeten të përkushtuar në mbrojtjen e votës së lirë të qytetarëve dhe trajtimit të çdo rasti të dyshuar, me synimin e mbrojtjes së integritetit të procesit zgjedhor dhe sundimit të ligjit”, thuhet në komunikatën e plotë.
