Artane Rizvanolli, ministre e Ekonomisë, u ka bërë sërish thirrje qytetarëve të Kosovës që gjatë dimrit të shmangin ngrohjen me energji elektrike, duke paralajmëruar se konsumi i lartë mund të çojë në rritje të tarifave të rrymës.
Duke folur në një diskutim me temë “Dekarbonizimi i sektorit të ngrohjes në Kosovë”, të organizuar nga Balkan Green Foundation, Rizvanolli tha se çmimet e importit të energjisë elektrike janë rritur deri në pesë herë, duke e cilësuar situatën si të jashtëzakonshme.
Sipas saj, nëse nuk ka kursim të energjisë, Kosova do të detyrohet të importojë sasi më të mëdha të rrymës, çka mund të rrezikojë furnizimin e rregullt dhe të ndikojë në rritjen e tarifave nga muaji prill i vitit të ardhshëm.
“Çmimet e importit janë pesëfishuar. Për të minimizuar ndikimin e kësaj krize, qytetarët duhet të kursejnë energjinë elektrike dhe të shfrytëzojnë alternativa të tjera për ngrohje”, tha Rizvanolli.
Ajo shtoi se moskursimi i energjisë rrit nevojën për import dhe rrezikon stabilitetin e sistemit energjetik, duke paralajmëruar se kjo mund të reflektohet edhe në çmimin që qytetarët paguajnë për rrymën.
