Prokuroria Themelore në Ferizaj ka kërkuar caktimin e masës së paraburgimit ndaj dy zyrtarëve të KEDS, të cilët dyshohen për marrje ryshfeti në këmbim të ofrimit të një shërbimi elektrik.
Sipas dyshimeve fillestare, zyrtarët në fjalë i kanë kërkuar një qytetari shumën prej 400 euro për të përshpejtuar procedurën e vendosjes së njehsorit elektrik në një lokal. Ata dyshohet se i kanë thënë qytetarit se, nëse nuk paguante shumën e kërkuar, do të përballej me vonesa të gjata në realizimin e shërbimit.
Pas pranimit të informatave dhe zhvillimit të veprimeve hetimore, autoritetet kanë ndërhyrë dhe kanë arrestuar të dyshuarit, të cilët më pas janë ndaluar me vendim të prokurorit.
Prokuroria ka vlerësuar se ekziston dyshim i bazuar se të njëjtit kanë kryer veprën penale dhe për këtë arsye ka paraqitur kërkesë në gjykatë për caktimin e paraburgimit, me qëllim të sigurimit të pranisë së tyre gjatë procedurës hetimore dhe parandalimit të ndikimit në hetime.
Rasti është në procedurë dhe pritet vendimi i gjykatës lidhur me masën e paraburgimit, ndërsa hetimet do të vazhdojnë për zbardhjen e plotë të rastit.
