Sekretari i Përgjithshëm i NATO-s, Mark Rutte, ka deklaruar se aleanca mbështet veprimet e presidentit amerikan Donald Trump në lidhje me Iranin, por ka theksuar se NATO nuk do të përfshihet drejtpërdrejt në konfliktin e mundshëm në Lindjen e Mesme.
Rutte ka vlerësuar operacionet e SHBA-së dhe aleatëve të saj, duke theksuar se ato synojnë të kufizojnë aftësinë e Iranit për të zhvilluar kapacitete bërthamore dhe raketa balistike. Sipas tij, programet ushtarake të Teheranit përbëjnë një kërcënim jo vetëm për rajonin, por edhe për Evropën.
Megjithatë, ai bëri të qartë se organizata si aleancë nuk ka plan të marrë pjesë në luftë. Rutte theksoi se NATO nuk është e përfshirë në konflikt dhe nuk ka diskutime për përfshirjen e saj në operacionet ushtarake kundër Iranit.
Sipas tij, disa vende anëtare mund të mbështesin politikisht apo ushtarakisht Shtetet e Bashkuara në mënyrë individuale, por jo në emër të NATO-s si organizatë.
Tensionet mes SHBA-së dhe Iranit janë rritur ndjeshëm së fundmi, duke shkaktuar reagime të ndryshme nga vendet perëndimore dhe duke rritur shqetësimet për përshkallëzimin e situatës në rajonin e Lindjes së Mesme.
