Rreth 20 metra kub dru të përpunuar janë sekuestruar nga Policia e Kosovës në komunën e Podujevës, gjatë një aksioni të zhvilluar në kuadër të planit operativ “Gatishmëria Vepruese-2026”.
Aksioni është realizuar në fshatin Lupç, ku njësitë policore ndaluan një kamion të tipit MAN me targa RKS (01) që po transportonte drutë. Automjeti drejtohej nga një person me inicialet K.B., i lindur në vitin 1991.
Gjatë kontrollit, policia konstatoi se drutë dyshohet se ishin të prerë dhe transportuar në mënyrë të kundërligjshme, ndaj u vendos sekuestrimi i tyre nga autoritetet kompetente.
Operacioni është pjesë e aktiviteteve të vazhdueshme të institucioneve të sigurisë për parandalimin e prerjeve ilegale të pyjeve dhe transportit të paligjshëm të druve, një dukuri që shpesh paraqet problem në disa zona të vendit.
Autoritetet kanë bërë të ditur se aksionet dhe kontrollet në terren do të vazhdojnë, ndërsa rastet e tilla do të trajtohen sipas ligjit.
