Mali i Zi ka bërë thirrje për ruajtjen e paqes dhe forcimin e bashkëpunimit rajonal, pasi Serbia konfirmoi blerjen e raketave kineze me kapacitete të avancuara ushtarake.
Zyra e presidentit të Malit të Zi, Jakov Millatoviq, ka theksuar se Podgorica mbetet e përkushtuar ndaj marrëdhënieve të mira fqinjësore dhe bashkëpunimit me të gjitha vendet e rajonit.
Në reagimin zyrtar thuhet se besimi dhe bashkëpunimi janë elemente kyçe për garantimin e paqes dhe zhvillimit të qëndrueshëm në Ballkanin Perëndimor.
Ndërkohë, Serbia ka konfirmuar blerjen e raketave balistike supersonike nga Kina, të tipit CM-400AKG, duke u bërë një nga vendet e para në Evropë që i posedon këto sisteme.
Ky zhvillim ka shkaktuar shqetësime në rajon, pasi këto raketa kanë kapacitet të godasin objektiva në distanca të mëdha dhe konsiderohen armë me fuqi të lartë shkatërruese.
Zyrtarë dhe analistë në rajon kanë paralajmëruar se armatosja e Serbisë mund të ndikojë në balancën e sigurisë në Ballkan, ndërsa Bashkimi Evropian ka theksuar se vendet që synojnë integrimin evropian duhet të bëjnë zgjedhje të qarta strategjike në politikën e tyre të sigurisë.
Thirrja e Malit të Zi për paqe dhe bashkëpunim vjen në një moment të ndjeshëm për rajonin, ku zhvillimet e fundit kanë rritur tensionet dhe shqetësimet për stabilitetin afatgjatë.
