I dyshuari për ushtrim të kundërligjshëm të veprimtarisë mjekësore, Arianit Sllamniku, është liruar nga masa e arrestit shtëpiak, pasi gjykata ka vendosur ndërprerjen e kësaj mase sigurie.
Sllamniku ishte fillimisht në paraburgim dhe më pas masa ndaj tij ishte zëvendësuar me arrest shtëpiak nga Gjykata Themelore në Gjilan, pas kërkesës së Prokurorisë.
Ai dyshohet për veprat penale “ushtrim i kundërligjshëm i veprimtarisë mjekësore” dhe “eksperimente të kundërligjshme”, pasi sipas hetimeve kishte ofruar trajtime dhe terapi të paautorizuara, duke pretenduar shërimin e sëmundjeve si autizmi, pa pasur kualifikim profesional.
Sipas autoriteteve, ai kishte rekomanduar metoda të paverifikuara dhe terapi jo të testuara shkencërisht, duke bashkëpunuar me persona të ndryshëm dhe duke përfituar mjete financiare nga këto aktivitete.
Vendimi i fundit për lirimin e tij nënkupton se ai do të mbrohet në liri, ndërsa procedurat hetimore ndaj tij pritet të vazhdojnë në institucionet përkatëse.
Rasti i Sllamnikut ka ngjallur reagime të shumta në opinionin publik, duke ngritur shqetësime për mbrojtjen e qytetarëve nga praktikat e paligjshme në fushën e shëndetësisë.
