Në prag të një ndeshjeje shumë të rëndësishme kundër Turqisë, Kombëtarja e Kosovës ka marrë një mesazh të veçantë mbështetjeje nga ish-kongresmeni amerikan me prejardhje shqiptare, Joe DioGuardi.
Në fjalët e tij, ai ka rikujtuar rrugëtimin e vështirë të popullit shqiptar drejt lirisë, duke e krahasuar atë me sukseset që Kosova po arrin sot në sport. DioGuardi theksoi se skuadra ka arritur rezultate të jashtëzakonshme duke mposhtur edhe shtete më të mëdha dhe më të fuqishme.
Ai shprehu dëshirën për të qenë pranë ekipit në këtë përballje, ndërsa vlerësoi se kjo ndeshje do të ndikojë pozitivisht në imazhin e shqiptarëve në arenën ndërkombëtare. Po ashtu, ai përmendi figurën e Skënderbeut si simbol frymëzimi dhe qëndrese.
Në fund, DioGuardi uroi fitore dhe theksoi se mezi pret t’i takojë futbollistët e Kosovës në Amerikë pas suksesit të tyre. Ndeshja pritet të zhvillohet në stadiumin “Fadil Vokrri”.
