Këshilltari i kryeministrit, Jeton Zulfaj, ka deklaruar se Kosova po vazhdon përgatitjet për fazat e ardhshme të procesit të integrimit evropian, duke punuar në përgatitjen për pyetësorin e Komisionit Evropian pas aplikimit për anëtarësim në Bashkimin Evropian.
Sipas Zulfajt, institucionet nuk kanë ndalur punën pas dorëzimit të aplikimit për anëtarësim, por kanë vijuar me përgatitjet teknike dhe koordinimin ndërinstitucional për t’iu përgjigjur kërkesave të Komisionit Evropian.
Ai theksoi se pyetësori i Komisionit Evropian përbën një nga hapat më të rëndësishëm në procesin e integrimit, pasi përmes tij vlerësohet niveli i përmbushjes së kritereve politike, ekonomike dhe ligjore nga vendi aplikues.
Zulfaj shtoi se përgatitjet synojnë ta vendosin Kosovën në pozitë sa më të mirë për avancimin e mëtejshëm në rrugën drejt anëtarësimit në Bashkimin Evropian.
