Ish-gjyqtari i Gjykatës së Apelit, Hasan Shala, ka komentuar aktgjykimin e Dhomave të Specializuara ndaj Hashim Thaçit dhe të tjerëve, duke e lidhur mënyrën se si është trajtuar rasti i Behajdin Allaqit me një deklaratë të Albin Kurtit në Kuvendin e Kosovës vite më parë. Shala i bëri komentet gjatë një interviste në emisionin “Frontal” në T7.
Sipas Shalës, formulimi që ai thotë se gjendet në aktgjykim për Allaqin është i njëjtë me atë që Kurti kishte përdorur në Kuvend.
“Tamam tekstin qysh e përmend në aktgjykim e ka thanë edhe Albin Kurti në Kuvend”, ka deklaruar Shala.
Referenca e Shalës lidhet me seancën e Kuvendit të 26 shkurtit 2016, kur po zhvillohej procesi për zgjedhjen e Hashim Thaçit president. Një video e publikuar atë ditë nga KosovaPress dokumenton se Kurti e kishte ngritur publikisht çështjen e fatit të Behajdin Allaqit dhe i kishte kërkuar Thaçit të tregonte se çfarë kishte ndodhur me të.
Në raportimet e asaj kohe, Kurti paraqitej duke ngritur dyshime për rrethanat e zhdukjes së Allaqit dhe duke thënë se Thaçi ishte personi i fundit që, sipas informacionit që ai paraqiste, kishte qenë me të. Këto ishin deklarata politike të Kurtit të bëra në Kuvend dhe jo konstatime gjyqësore në atë kohë.
Dhjetë vjet më vonë, Trupi Gjykues i Dhomave të Specializuara arriti në konstatime konkrete lidhur me rastin e Allaqit. Sipas përmbledhjes zyrtare të aktgjykimit, Gjykata konstatoi se Hashim Thaçi dhe Kadri Veseli e morën Behajdin Allaqin në pranga në Drenoc, se ai nuk u pa më dhe se Trupi Gjykues u bind se ishte vrarë. Gjykata konstatoi gjithashtu se Thaçi kishte marrë pjesë personalisht në arrestimin, ndalimin, transferimin dhe vrasjen e Allaqit.
Megjithatë, pretendimi i Shalës se formulimi ishte “i njëjti tekst” duhet trajtuar si vlerësim i tij. Burimet publike verifikojnë se Kurti foli për Allaqin në Kuvend më 2016 dhe se rasti i Allaqit është pjesë e konstatimeve të aktgjykimit të Hagës, por këto burime nuk mjaftojnë për të konfirmuar se dy deklarimet janë fjalë për fjalë identike.
Rasti i Allaqit është bërë një prej pikave më të diskutuara pas aktgjykimit të 16 shtatorit. Mbrojtja e Thaçit ka kundërshtuar konstatimet e Gjykatës dhe ka paralajmëruar se çështje që lidhen me provat, përfshirë rastin e Allaqit, do të jenë pjesë e argumenteve të saj në procedurën e apelit.
