Kryeministri i Kosovës, Albin Kurti, ka pritur në takim ambasadorin e Mbretërisë së Bashkuar në Kosovë, Jonathan Hargreaves, me të cilin ka diskutuar për zhvillimet e fundit politike në vend.
Në fokus të veçantë të takimit ka qenë përmbyllja e procesit të formimit të institucioneve, në një periudhë kur në Kosovë vazhdojnë zhvillimet politike që lidhen me kompletimin e strukturës institucionale.
Hargreaves e ka uruar Kurtin për Qeverinë dhe mandatin e ri, ndërsa të dyja palët kanë shprehur gatishmëri për vazhdimin e bashkëpunimit dhe thellimin e marrëdhënieve ndërmjet Kosovës dhe Mbretërisë së Bashkuar.
Gjatë takimit është diskutuar edhe për zgjerimin e partneritetit strategjik ndërmjet dy vendeve, veçanërisht në fushat e tregtisë, investimeve dhe teknologjisë.
Një tjetër fushë ku synohet bashkëpunim më i madh është sporti, përfshirë përgatitjet që lidhen me Lojërat Mesdhetare, të cilat Kosova do t’i organizojë në vitet e ardhshme.
Kurti dhe Hargreaves kanë zhvilluar edhe më herët takime për stabilitetin institucional dhe marrëdhëniet dypalëshe. Në shtator, dy zyrtarët kishin diskutuar për bashkëpunimin në ekonomi, teknologji, mbrojtje, energji dhe luftimin e dezinformimit.
Jonathan Hargreaves është ambasador i Mbretërisë së Bashkuar në Kosovë që nga viti 2024.
