Gjykata Themelore në Pejë e ka dënuar me 22 vjet burgim Anton Ndrecajn për vrasjen e fqinjit të tij, Mark Ademi, në një rast që kishte ndodhur në prill të vitit 2022, në fshatin Pataqan të Klinës.
Aktgjykimi është shpallur të enjten, më 15 tetor 2026, nga Departamenti për Krime të Rënda, i cili e ka shpallur fajtor Ndrecajn për tri vepra penale.
Për veprën penale të vrasjes, gjykata i ka shqiptuar 19 vjet burgim, ndërsa për vrasje të rëndë në tentativë e ka dënuar me pesë vjet të tjera.
Ndrecaj është dënuar edhe me një vit burgim për mbajtje, kontroll ose posedim të paautorizuar të armëve. Pas bashkimit të dënimeve, gjykata ka caktuar dënimin unik prej 22 vjetësh burgim.
Vendimi është marrë nga trupi gjykues i kryesuar nga gjyqtari Musë Povataj, me anëtarët Veton Ademaj dhe Shaqë Curri.
Gjykata ka urdhëruar gjithashtu konfiskimin e armëve dhe municionit të sekuestruar gjatë hetimeve, si dhe vazhdimin e paraburgimit ndaj të dënuarit deri në marrjen e formës së prerë të aktgjykimit, por jo më gjatë se dënimi i shqiptuar.
Ngjarja kishte ndodhur më 15 prill 2022, pas një konflikti mes familjarëve të viktimës dhe të dënuarit, që fillimisht kishte nisur si mosmarrëveshje verbale dhe më pas ishte përshkallëzuar në përleshje fizike.
Gjatë incidentit, Mark Ademi ishte plagosur me armë zjarri. Ai fillimisht ishte dërguar për trajtim mjekësor në Klinë, ndërsa më pas ishte transportuar në Spitalin Rajonal të Pejës, ku ishte konstatuar vdekja e tij.
Pas ngjarjes, Policia kishte arrestuar disa persona dhe kishte zhvilluar kontrolle në disa objekte, ku ishin sekuestruar armë dhe municion.
Vendimi i shpallur nga Gjykata Themelore në Pejë vjen rreth katër vjet e gjysmë pas vrasjes, ndërsa aktgjykimi ende nuk është i formës së prerë.
