Gjykata e Apelit ka refuzuar ankesën e mbrojtjes së ish-deputetit Gani Geci, duke lënë në fuqi vendimin për caktimin e masës së paraburgimit prej 30 ditësh ndaj tij, nën dyshimin për kanosjen e gazetarit Lirim Mehmetaj.
Vendimi është bërë i ditur më 21 tetor, pasi mbrojtja kishte kërkuar anulimin e aktvendimit të Gjykatës Themelore në Prishtinë dhe lirimin e Gecit.
Si alternativë, avokati i tij, Besnik Berisha, kishte propozuar zëvendësimin e paraburgimit me masën e ndalimit të afrimit ndaj personit ose vendit të caktuar.
Megjithatë, Gjykata e Apelit e ka vlerësuar ankesën si të pabazuar, duke konfirmuar vendimin e shkallës së parë.
Si nisi rasti ndaj Gani Gecit?
Rasti lidhet me një postim të gazetarit Lirim Mehmetaj në Facebook, në të cilin përmendej deputeti i Lëvizjes Vetëvendosje, Fatos Geci.
Sipas Prokurorisë Themelore në Prishtinë, më 11 tetor 2026, Gani Geci dyshohet se kishte shkuar në zyrat e mediumit “Vox Kosova”, ku i kishte kërkuar Mehmetajt ta largonte ose ta ndryshonte postimin.
Pas refuzimit të kërkesës, Prokuroria pretendon se Geci e kishte kanosur gazetarin.
Në dosjen e Prokurorisë përmendet edhe një incident tjetër, kur Geci kishte shkuar pranë objektit të televizionit Dukagjini, ku Mehmetaj po merrte pjesë në emisionin “Debat Plus”.
Sipas organit të akuzës, Geci kishte qëndruar aty për rreth dy orë, duke pritur daljen e gazetarit nga studioja.
Ish-deputeti ishte ndaluar nga Policia më 12 tetor, ndërsa më 14 tetor Gjykata Themelore në Prishtinë ia kishte caktuar masën e paraburgimit prej 30 ditësh.
Gjatë seancës dëgjimore, Geci kishte mohuar se e kishte kanosur Mehmetajn, duke deklaruar se kishte kërkuar vetëm mbrojtjen e familjes së tij.
Mbrojtja kishte kundërshtuar arsyetimin për caktimin e paraburgimit, duke pretenduar se nuk ishin plotësuar kushtet ligjore për një masë të tillë.
Me vendimin e Apelit, paraburgimi mbetet në fuqi. Ky vendim lidhet vetëm me masën e sigurisë dhe nuk përbën shpallje të fajësisë së Gecit për veprën penale për të cilën dyshohet.
