Një ish-banore e Big Brother VIP Albania dhe një ish-futbollist i KF Prishtina e Re janë raportuar në mesin e nëntë personave të arrestuar gjatë një operacioni të Policisë së Kosovës kundër mashtrimeve të dyshuara përmes qendrave të thirrjeve, të njohura si Call Center.
Bëhet fjalë për Ariana Plakicin, e njohur me emrin artistik Ari Blue, dhe Toni Salihun, të cilët, sipas identifikimit të publikuar nga Gazeta Sinjali, janë në mesin e personave të ndaluar gjatë aksionit të 23 tetorit 2026 në rajonin e Prishtinës.
Ariana Plakici ishte pjesëmarrëse në edicionin e dytë të Big Brother VIP Albania, ndërsa Toni Salihu ka luajtur për KF Prishtina e Re dhe është aktivizuar edhe në futbollin shqiptar.
Prokuroria Themelore në Ferizaj ka konfirmuar ndalimin e nëntë personave për 48 orë, duke publikuar inicialet e tyre, përfshirë A.P. dhe T.S., por jo emrat e plotë.
Sipas dyshimeve të Prokurorisë, të ndaluarit kanë vepruar gjatë vitit 2026 në disa lokacione në Prishtinë, duke shfrytëzuar qendra ilegale të thirrjeve për të kontaktuar shtetas të huaj dhe për t’u ofruar investime në kriptovaluta.
Hetuesit dyshojnë se personat e dëmtuar, kryesisht shtetas suedezë, janë nxitur të investojnë para në Bitcoin përmes ofertave të rreme. Mjetet financiare më pas dyshohet se janë transferuar në llogari të tjera, duke u shkaktuar viktimave dëme materiale.
Operacioni policor është zhvilluar të premten, më 23 tetor, në Prishtinë dhe Obiliq, ku janë kontrolluar katër lokacione.
Gjatë bastisjeve, Policia e Kosovës ka konfiskuar 39 kompjuterë, pesë telefona celularë, 12 pajisje të jashtme për ruajtjen e të dhënave, një veturë, një armë me gjashtë fishekë, si dhe 850 euro dhe 100 franga zvicerane.
Në pajisjet kompjuterike janë gjetur edhe të dhëna të shtetasve të huaj, të cilat dyshohet se përdoreshin për t’i kontaktuar ata në kuadër të veprimtarisë së pretenduar mashtruese.
Nga nëntë të arrestuarit, gjashtë janë shtetas të Kosovës dhe tre shtetas të Gjermanisë, sipas raportit të Policisë.
Prokuroria Themelore në Ferizaj ka kërkuar nga Gjykata Themelore në Prishtinë caktimin e masës së paraburgimit ndaj nëntë të dyshuarve për veprat penale “Mashtrimi” dhe “Mashtrimi kompjuterik”.
Sipas kërkesës së Prokurorisë, ekziston dyshimi se të pandehurit kanë përdorur sisteme kompjuterike për të mundësuar qasje në distancë në pajisjet e personave të dëmtuar, duke u paraqitur si përfaqësues të kompanive të investimeve financiare.
Gjatë operacionit, dy persona dyshohet se kanë sulmuar edhe zyrtarë policorë gjatë kryerjes së detyrës.
Vlera e përgjithshme e dëmit financiar nuk është bërë publike, ndërsa hetimet po vazhdojnë për të përcaktuar përgjegjësinë individuale të secilit të dyshuar.
Të gjithë personat e përmendur në këtë rast prezumohen të pafajshëm derisa fajësia e tyre të vërtetohet me vendim gjyqësor të formës së prerë. /Raporton Sinjali
