Punëtori që u lëndua në vendin e punës në Obiliq ndodhet në gjendje stabile shëndetësore dhe po vazhdon trajtimin në Klinikën e Mjekimit Intensiv në Qendrën Klinike Universitare të Kosovës (QKUK).
Sipas informacioneve të bëra publike, pacienti është nën mbikëqyrjen e vazhdueshme të ekipit mjekësor, ndërsa gjendja e tij është stabilizuar pas ndërhyrjeve dhe trajtimit të ofruar.
Mjekët kanë bërë të ditur se ai do të vazhdojë të qëndrojë në repartin e Mjekimit Intensiv për monitorim dhe trajtim të mëtejshëm, derisa gjendja e tij të lejojë transferimin në një repart tjetër.
Ndërkohë, autoritetet kompetente po vazhdojnë hetimet për të sqaruar rrethanat e aksidentit në vendin e punës dhe për të përcaktuar përgjegjësitë eventuale.
