Kryeministri i Kosovës, Albin Kurti, ka reaguar pas aktgjykimit të Dhomave të Specializuara në Hagë ndaj Hashim Thaçit, Kadri Veselit, Rexhep Selimit dhe Jakup Krasniqit, duke e kundërshtuar ashpër vendimin.
“Shpallja fajtorë dhe dënimi kaq i rëndë për ish-krerët e UÇK-së është një padrejtësi e papranueshme, ndëshkim i madh dhe i dëmshëm”, ka deklaruar Kurti në reagimin e tij.
Kurti ka theksuar gjithashtu se aktgjykimi rrëzoi pretendimin se UÇK-ja kishte kryer një sulm të gjerë dhe sistematik kundër një popullsie civile. Ky është interpretimi që kryeministri i ka bërë përmbajtjes së aktgjykimit.
Sipas tij, fakti që vendimi është shpallur formalisht në emër të popullit të Kosovës nuk do të thotë se ai përfaqëson vullnetin e qytetarëve. Kurti ka kërkuar që vendimi të ndryshohet dhe korrigjohet në procedurën e apelit.
“Në këto momente të vështira, jemi pranë familjeve të ish-krerëve të UÇK-së dhe të gjithë bashkëluftëtarëve çlirimtarë”, ka thënë Kurti në fund të reagimit.
Vetëm tri ditë më herët, gjatë prezantimit të qeverisë së re në Kuvend, Kurti kishte deklaruar se kërkesa e Prokurorisë ndaj ish-krerëve të UÇK-së ishte, sipas tij, “e padrejtë dhe e pabesueshme”. Kuvendi e zgjodhi qeverinë e re të drejtuar prej tij më 13 shtator me 62 vota.
