Altin Krasniqi, djali i ish-kryeparlamentarit Jakup Krasniqi, ka bërë të ditur se e ka vizituar babanë e tij në Hagë pas shpalljes së aktgjykimit të 16 shtatorit.
Përmes një postimi në Facebook, Krasniqi tregoi se gjatë takimit i ati kishte shprehur falënderim për shqiptarët që, sipas tij, i kanë dhënë mbështetje Ushtrisë Çlirimtare të Kosovës dhe luftës së saj.
“Sapo përfundova vizitën me babin. Ai falënderon secilin shqiptar për mbështetjen që i është dhënë luftës së drejtë të Ushtrisë Çlirimtare të Kosovës”, shkroi Altin Krasniqi.
Ai tha se Jakup Krasniqi dhe ish-krerët e tjerë të UÇK-së janë “të fortë, krenarë dhe me ndërgjegje të pastër për veprimtarinë e tyre”, ndërsa shprehu qëndrimin se aktgjykimi nuk është vetëm çështje e tyre personale.
“Ky është një dënim për popullin dhe shtetin e Kosovës. UÇK-ja është dhe do të mbetet krenaria jonë”, ka shkruar ai. Ky është vlerësimi i Altin Krasniqit për vendimin e gjykatës.
Jakup Krasniqi ishte një nga katër të pandehurit në rastin Thaçi dhe të tjerët, aktgjykimi i shkallës së parë për të cilin ishte caktuar të shpallej më 16 shtator në Dhomat e Specializuara në Hagë.
