Presidentja e Kosovës, Justina Shiroka-Pula, është takuar të premten, më 23 tetor, me presidentin e Hungarisë, András Baka, gjatë vizitës së saj zyrtare në Budapest.
Në takim janë diskutuar marrëdhëniet ndërmjet dy shteteve, integrimi evropian i Kosovës, bashkëpunimi ekonomik dhe çështjet e sigurisë në rajon.
Shiroka-Pula ka vlerësuar marrëdhëniet me Hungarinë, duke rikujtuar se ky shtet ishte ndër të parët që njohu pavarësinë e Kosovës, më 19 mars 2008.
Ajo ka shprehur gatishmërinë për thellimin e bashkëpunimit dypalësh, veçanërisht në ekonomi, arsim dhe mbrojtje.
Shiroka-Pula kërkon mbështetjen e Hungarisë për integrimin evropian
Një nga temat kryesore të takimit ishte procesi i integrimit të Kosovës në Bashkimin Evropian.
Presidentja ka theksuar se anëtarësimi në BE mbetet synim strategjik i Kosovës, duke kërkuar mbështetjen e Hungarisë për avancimin drejt statusit të vendit kandidat dhe për hapat e tjerë të procesit integrues.
Kosova e ka dorëzuar aplikimin për anëtarësim në Bashkimin Evropian në dhjetor të vitit 2022, por ende nuk e ka marrë statusin e vendit kandidat.
Vlerësohet kontributi hungarez në KFOR
Gjatë takimit, Shiroka-Pula ka falënderuar Hungarinë për kontributin e saj në misionin paqeruajtës të NATO-s në Kosovë, KFOR.
Ajo ka vlerësuar rolin e ushtarëve hungarezë në ruajtjen e sigurisë dhe stabilitetit, ndërsa është diskutuar edhe mundësia e forcimit të bashkëpunimit në fushën e mbrojtjes.
Në përfundim të takimit, presidentja e Kosovës e ka ftuar homologun e saj hungarez për një vizitë zyrtare në Kosovë, në një kohë të përshtatshme për të dyja palët.
Vizita zhvillohet në 70-vjetorin e Revolucionit Hungarez
Takimi është zhvilluar në kuadër të vizitës së Shiroka-Pulës në Budapest, ku ajo ka udhëtuar me ftesë të presidentit Baka për të marrë pjesë në ceremoninë shtetërore të 70-vjetorit të Revolucionit Hungarez të vitit 1956.
Në këtë ceremoni janë ftuar afro 100 liderë dhe përfaqësues politikë nga vende të ndryshme të botës.
Në agjendën e presidentes është përfshirë edhe një takim me përfaqësues të mërgatës shqiptare që jetojnë dhe veprojnë në Hungari.
