Gjykimi ndaj Sefe Fetoshit, Kushtrim Bytyqit dhe Enis Shtavicës, të akuzuar për blerje, posedim, shpërndarje dhe shitje të paautorizuar të narkotikëve, është shtyrë të enjten në Gjykatën Themelore në Prizren.
Në seancën e 10 shtatorit 2026 ishin të pranishëm prokurori Mehdi Sefa, tre të akuzuarit dhe dy prej avokatëve mbrojtës, ndërsa mungoi avokati Besnik Berisha.
Berisha kishte njoftuar Gjykatën përmes një parashtrese se në të njëjtën kohë ndodhej në një seancë tjetër në Gjykatën e Apelit dhe kishte kërkuar shtyrjen e gjykimit.
Për shkak të mungesës së tij, kryetari i trupit gjykues, Artan Sejrani, konstatoi se nuk ishin plotësuar kushtet për vazhdimin e shqyrtimit gjyqësor. Seanca e radhës është caktuar për 16 dhjetor 2026.
Sipas aktakuzës, Fetoshi, Bytyqi dhe Shtavica dyshohet se kanë vepruar si grup në Prizren, Xërxë dhe Gjakovë, duke blerë, poseduar, shpërndarë dhe shitur kokainë.
Prokuroria pretendon se Fetoshi kishte blerë kokainë nga persona të panjohur dhe, në marrëveshje me Shtavicën, e kishte mbajtur atë në shtëpinë e këtij të fundit në Gjakovë. Më pas, për shlyerjen e një borxhi, Fetoshi dyshohet se i kishte ofruar Bytyqit 50.35 gramë kokainë për shitje.
Sipas aktakuzës, më 2 tetor 2023, Bytyqi dyshohet se këtë sasi ia kishte shitur një personi me emrin “Amir” për 2 mijë euro. Pretendohet se 1,900 euro ishin paguar menjëherë, ndërsa 100 euro do të paguheshin në një takim tjetër.
Gjatë bastisjes së shtëpisë së Shtavicës në Gjakovë më 28 mars 2024, autoritetet kishin konfiskuar qese me substanca të dyshuara narkotike, peshore digjitale dhe materiale të tjera. Ekspertiza laboratorike kishte konstatuar kokainë të përzier me prokainë, si dhe 0.80 gramë kanabis.
Tre të pandehurit akuzohen se në bashkëkryerje kanë kryer veprën penale të blerjes, posedimit, shpërndarjes dhe shitjes së paautorizuar të narkotikëve, substancave psikotrope dhe analoge.
