Qendra për Informim, Kritikë dhe Aksion (QIKA) ka kërkuar dorëheqjen e ministres së Drejtësisë, Donika Gërvalla, duke zhvilluar një aksion simbolik në hyrje të Ministrisë së Drejtësisë, pas vrasjes së Arlinda Zekajt në Pejë.
Të martën, më 27 tetor, aktivistet e organizatës kanë vendosur në dyert e institucionit mbishkrime përmes të cilave kërkojnë përgjegjësi politike dhe institucionale për rastin e 49-vjeçares, e cila ishte vrarë pavarësisht kërkesave të mëhershme për mbrojtje.
“Arlinda nuk e kishte gabuar adresën. Shteti e braktisi”, është një nga mesazhet e vendosura në hyrje të Ministrisë.
Në afishet e tjera, QIKA i është drejtuar drejtpërdrejt ministres Gërvalla me thirrjen për dorëheqje.
Aksioni vjen një ditë pas reagimit të organizatës ndaj deklaratave të Gërvallës në seancën e jashtëzakonshme të Kuvendit të Kosovës, ku u diskutua për vrasjen e Arlinda Zekajt dhe përgjegjësinë e institucioneve që kishin trajtuar rastin e saj.
Gjatë seancës së 26 tetorit, ministrja deklaroi se Arlinda i ishte drejtuar sistemit të drejtësisë, por nuk kishte marrë mbrojtjen e kërkuar. Ajo shtoi se viktima nuk i ishte drejtuar Qeverisë dhe se një kërkesë e tillë mund të kishte sjellë angazhim institucional.
Kjo deklaratë nxiti kritika nga QIKA, e cila e akuzoi ministren se po e zhvendoste përgjegjësinë nga institucionet te viktima.
Organizata theksoi se Arlinda kishte ndjekur procedurat ligjore dhe kishte kërkuar ndihmë nga autoritetet kompetente, por nuk ishte arritur të parandalohej vrasja e saj.
QIKA ka rikujtuar gjithashtu se Donika Gërvalla, përveç pozitës së ministres së Drejtësisë, mban edhe detyrën e Koordinatores Kombëtare për Mbrojtje nga Dhuna në Familje, Dhuna ndaj Grave dhe Dhuna me Bazë Gjinore.
Në këtë pozitë, në të cilën u emërua më 13 mars 2026, ajo ka përgjegjësi për koordinimin e bashkëpunimit ndërinstitucional dhe forcimin e mekanizmave për parandalimin e dhunës.
Sipas QIKA-s, ndarja kushtetuese e pushteteve dhe mungesa e kompetencave për shkarkimin e gjyqtarëve apo prokurorëve nuk e përjashtojnë përgjegjësinë politike për funksionimin e mekanizmave mbrojtës.
Ndërkohë, Gërvalla kishte sqaruar deklaratën e saj në Kuvend, duke theksuar se nuk kishte synuar t’u kërkonte viktimave të dhunës t’i anashkalonin institucionet e drejtësisë dhe t’i drejtoheshin Qeverisë.
Ministrja kishte pranuar gjithashtu se nga takimi i jashtëzakonshëm ndërinstitucional për rastin e Arlindës nuk kishte dalë me bindjen se të gjitha institucionet përgjegjëse i kishin përmbushur detyrat e tyre.
Vrasja e Arlinda Zekajt më 25 tetor në Vitomiricë të Pejës ka nxitur protesta dhe reagime të shumta në Kosovë, ndërsa institucionet kanë nisur verifikimin e veprimeve dhe mosveprimeve të mundshme gjatë trajtimit të denoncimeve të saj.
Një ditë më parë, QIKA kishte zhvilluar edhe një aksion para ndërtesës së Qeverisë, ku kishte vendosur mesazhin “Shteti e vrau Arlindën” dhe kishte hedhur ngjyrë të kuqe në shkallë.
Aksioni i fundit në Ministrinë e Drejtësisë e ka drejtuar kërkesën për llogaridhënie posaçërisht ndaj Donika Gërvallës, ndërsa përgjegjësia eventuale ligjore e zyrtarëve institucionalë mbetet objekt i hetimeve.
