Kryeministri i Kosovës, Albin Kurti, ka komentuar aktgjykimin e fundit të Gjykatës Kushtetuese lidhur me afatin për zgjedhjen e presidentit të ri, duke thënë se vendimi ka krijuar një situatë urgjente për veprim politik.
Kurti tha se, sipas vlerësimit të tij, aktgjykimi ka prodhuar një “normë të re kushtetuese” lidhur me mënyrën se si rrjedh afati për zgjedhjen e presidentit ose presidentes së vendit.
Ai rikujtoi marrëveshjen e arritur më herët ndërmjet Lëvizjes Vetëvendosje dhe LDK-së për kandidaturën e Bekim Sejdiut, duke deklaruar se ajo kishte mbështetjen e strukturave drejtuese të LDK-së, por nuk mori përkrahjen e gjashtë deputetëve të kësaj partie.
Kurti tha se, përveç ditës së sotme, kanë mbetur edhe gjashtë ditë të plota për t’i dhënë Kosovës president ose presidente të re.
Sipas tij, edhe arritja e një marrëveshjeje të re mbetet e mundshme, ndërsa u bëri thirrje partive politike që të ulen së bashku për të gjetur një zgjidhje para përfundimit të afatit kushtetues.
Gjykata Kushtetuese ka përcaktuar se afati 60-ditor për zgjedhjen e presidentit ka filluar më 8 gusht 2026 dhe përfundon më 6 tetor 2026. Nëse presidenti nuk zgjidhet brenda këtij afati, aktivizohen dispozitat kushtetuese për shpërndarjen e Kuvendit dhe zgjedhjet e reja.
Kurti argumentoi se zgjedhjet e reja parlamentare nuk do të ishin zgjedhje për president, pasi kreu i shtetit në Kosovë zgjidhet nga Kuvendi. Për këtë arsye, ai kërkoi që partitë të tentojnë arritjen e një marrëveshjeje brenda legjislaturës aktuale.
Ai i cilësoi zgjedhjet e reja si të panevojshme dhe të kushtueshme, duke theksuar se vendi tashmë ka Kuvend dhe Qeveri funksionale.
Kurti iu referua edhe deklaratës së miratuar së fundmi nga Kuvendi me 99 vota, duke kërkuar më shumë bashkëpunim ndërmjet forcave politike për çështjet që, sipas tij, kërkojnë përgjegjësi shtetërore.
Me afrimin e 6 tetorit, partitë parlamentare kanë një periudhë të shkurtër për të arritur marrëveshje dhe për ta përfunduar procedurën e zgjedhjes së presidentit brenda afatit të përcaktuar.
