Kryeministri i Kosovës, Albin Kurti, ka ngritur shqetësimin për diskriminimin e shqiptarëve në Luginën e Preshevës, duke deklaruar se ata vazhdojnë të përballen me pabarazi të mëdha në punësim dhe përfaqësim në institucionet shtetërore të Serbisë.
Pas seancës së Kuvendit të Kosovës, të enjten, më 15 tetor, Kurti tha se Qeveria e Kosovës vazhdon t’i mbështesë shqiptarët e Preshevës, Bujanocit dhe Medvegjës, si në aspektin politik, ashtu edhe në atë financiar.
Ai solli si shembull gjendjen në Policinë e Serbisë dhe në sektorin e shëndetësisë, duke pretenduar se prej vitit 2016 nuk është pranuar asnjë polic i ri shqiptar në tri komunat e Luginës.
Sipas Kurtit, nga mbi 1,300 të punësuar në Spitalin e Vranjës, vetëm dy mjekë janë shqiptarë.
“Ka shumë punë atje për t’i rregulluar padrejtësitë dhe që shqiptarët t’i kenë të drejtat që u takojnë atyre”, deklaroi Kurti.
Kryeministri theksoi se synimi i institucioneve të Kosovës është që shqiptarëve në Serbi t’u garantohen të drejtat kombëtare, qytetare dhe njerëzore.
Ai përshëndeti edhe marrëveshjen e subjekteve politike shqiptare për të garuar me një listë të përbashkët, të quajtur “Koalicioni Shqiptar”, në zgjedhjet parlamentare të Serbisë, të planifikuara për 25 tetor.
“E përshëndesim faktin që në zgjedhjet atje do ta kemi një subjekt të përbashkët, që quhet ‘Koalicioni Shqiptar’”, u shpreh Kurti, duke e cilësuar diskriminimin ndaj shqiptarëve si të jashtëzakonshëm.
Deklaratat e tij vijnë një ditë pasi Qeveria e Kosovës miratoi ndarjen e 1 milion e 852 mijë e 350 eurove e 16 centëve për Këshillin Kombëtar Shqiptar, në kuadër të mbështetjes për shqiptarët e Luginës së Preshevës.
Mjetet janë ndarë në bazë të bashkëpunimit ndërmjet Qeverisë së Kosovës dhe Këshillit Kombëtar Shqiptar, me qëllim mbështetjen e programeve që lidhen me arsimin, kulturën, identitetin dhe zhvillimin institucional të shqiptarëve në Preshevë, Bujanoc dhe Medvegjë.
Marrëveshja për listën e përbashkët “Koalicioni Shqiptar” ishte arritur më 29 shtator, në një takim të përfaqësuesve të partive shqiptare në Zyrën e Kryeministrit të Kosovës.
Ndërkohë, më 9 tetor, Kurti kishte kërkuar edhe nga komisioneri i lartë i OSBE-së për pakicat kombëtare, Christophe Kamp, angazhim më të madh për adresimin e pasivizimit të adresave, pengesave në arsim dhe nënpërfaqësimit të shqiptarëve në institucionet publike të Serbisë.
Shifrat për punësimin në polici dhe në Spitalin e Vranjës janë paraqitur nga Kurti gjatë deklaratës së tij dhe nuk janë konfirmuar në mënyrë të pavarur përmes statistikave të institucioneve serbe.
