Presidentja e Kosovës, Justina Shiroka-Pula, pritet të marrë vendim për Ligjin për Dhomat e Specializuara brenda afatit kushtetues prej tetë ditësh, pasi dokumenti i është përcjellë zyrtarisht nga Kuvendi i Kosovës.
Këtë e ka konfirmuar këshilltari për media i Presidentes, Bekim Kupina, i cili ka bërë të ditur se Shiroka-Pula do t’i ndërmarrë veprimet e nevojshme në përputhje me afatet e përcaktuara me ligj.
“Kuvendi i Kosovës sot e ka përcjellë Ligjin për Dhoma të Specializuara në Presidencë. Presidentja Shiroka Pula do t’i ndërmarrë veprimet e nevojshme brenda afatit ligjor”, ka deklaruar Kupina.
Ligji është nënshkruar dhe i është përcjellë Presidentes nga kryetarja e Kuvendit, Albulena Haxhiu, më 15 tetor.
Sipas nenit 80 të Kushtetutës së Kosovës, Presidentja ka tetë ditë kohë nga pranimi i ligjit për ta shpallur atë ose për ta kthyer në Kuvend për rishqyrtim.
Nëse ligji është pranuar më 15 tetor, afati tetëditor për vendim përfundon më 23 tetor.
Në rast se Presidentja nuk ndërmerr asnjë veprim brenda këtij afati, ligji konsiderohet automatikisht i shpallur, edhe pa nënshkrimin e saj, dhe publikohet në Gazetën Zyrtare.
Megjithatë, shpallja nuk nënkupton domosdoshmërisht hyrjen e menjëhershme në fuqi. Kushtetuta përcakton se ligjet hyjnë në fuqi 15 ditë pas publikimit në Gazetën Zyrtare, përveç nëse vetë ligji parasheh ndryshe.
Kuvendi i Kosovës i miratoi ndryshimet në Ligjin për Dhomat e Specializuara dhe Zyrën e Prokurorit të Specializuar më 6 tetor, me 88 vota për, asnjë kundër dhe asnjë abstenim.
Ndryshimet e miratuara përfshijnë kufizimin e dënimit maksimal me burgim në 15 vjet, ndryshime në juridiksionin e gjykatës dhe mundësinë e vuajtjes së dënimeve në Kosovë.
Miratimi i ligjit ka shkaktuar reagime edhe nga Bashkimi Evropian, i cili më 8 tetor shprehu shqetësimin se ndryshimet bien ndesh me detyrimet ndërkombëtare të Kosovës dhe kërkoi respektimin e pavarësisë së Dhomave të Specializuara.
Tashmë, mbetet të shihet nëse presidentja Shiroka-Pula do ta nënshkruajë ligjin apo do ta shfrytëzojë të drejtën kushtetuese për ta kthyer atë në Kuvend.
