Deputeti i Partisë Demokratike të Kosovës (PDK), Enver Hoxhaj, dhe zëvendëskryeministri i parë, Glauk Konjufca, raportohet se janë takuar, pas një serie bisedimesh mes kryeministrit Albin Kurti dhe kryetarit të PDK-së, Bedri Hamza.
Takimi i dy politikanëve është raportuar në një periudhë kur kontaktet mes përfaqësuesve të pushtetit dhe opozitës janë intensifikuar, sidomos pas zhvillimeve lidhur me Ligjin për Dhomat e Specializuara dhe zgjedhjen e presidentit të Kosovës.
Megjithatë, ende nuk dihet nëse Hoxhaj dhe Konjufca kanë diskutuar për këto çështje apo për tema të tjera. Nuk është konfirmuar as ndonjë marrëveshje mes tyre.
Kryeministri Albin Kurti dhe kryetari i PDK-së, Bedri Hamza, kishin zhvilluar disa takime gjatë javëve të fundit.
Më 17 shtator, një ditë pas shpalljes së aktgjykimit ndaj katër ish-krerëve të UÇK-së në Hagë, Kurti dhe Hamza diskutuan për mundësitë e mbështetjes së procesit të Apelit, duke u zotuar për komunikim të rregullt për çështje të interesit shtetëror.
Takime të tjera mes tyre u zhvilluan edhe në fillim të tetorit, kur në qendër të diskutimeve ishte miratimi i ndryshimeve në Ligjin për Dhomat e Specializuara dhe çështja e zgjedhjes së presidentit.
Më 5 tetor, dy liderët u takuan sërish, por nga ai takim nuk u bë e ditur ndonjë marrëveshje përfundimtare.
Raportimi për takimin mes Hoxhajt dhe Konjufcës vjen në këtë kontekst të komunikimeve ndërmjet përfaqësuesve të dy subjekteve politike, të cilat kanë pasur qëndrime të ndryshme për disa prej çështjeve kryesore institucionale.
Deri më tani, nuk ka një deklaratë të konfirmuar nga dy politikanët që sqaron përmbajtjen e takimit të raportuar.
