Fermerët në Kosovë pritet të fillojnë t’i marrin pagesat e subvencioneve për vitin 2026 gjatë kësaj jave, ka njoftuar Ministria e Bujqësisë, Pylltarisë dhe Zhvillimit Rural.
Sipas njoftimit të publikuar të hënën, më 19 tetor, përmes Agjencisë për Zhvillimin e Bujqësisë (AZhB), këtë javë do të nisë lëshimi i vendimeve dhe realizimi i pagesave për sipërfaqet bujqësore në kuadër të Programit të Pagesave Direkte 2026.
Për këtë program janë pranuar gjithsej 33,460 aplikime, ndërsa ministria ka konfirmuar se tashmë kanë përfunduar shqyrtimi administrativ i aplikimeve dhe kontrollet në terren për sipërfaqet bujqësore.
Paralelisht me realizimin e pagesave, do të publikohen edhe listat e përfituesve, përmes të cilave fermerët do të mund të informohen për rezultatet e procesit.
Pas përfundimit të kësaj faze, Agjencia për Zhvillimin e Bujqësisë do të vazhdojë me realizimin e pagesave për skemat e tjera të mbështetjes në sektorin e bujqësisë.
Çfarë ndodh me subvencionet për grurin?
Ministria ka dhënë një sqarim të veçantë edhe për fermerët që kanë aplikuar për mbështetje në bazë të sasisë së prodhuar të grurit.
Sipas njoftimit, aplikimet për grurin për kilogram gjatë vitit 2026 do të trajtohen në përputhje me pragjet e rendimentit të përcaktuara në Udhëzimin Administrativ nr. 02/2026.
Ministria ka theksuar se vendimi për përcaktimin e rendimentit mesatar kombëtar do të reflektohet në kriteret e programit të ardhshëm dhe nuk do të ndikojë në aplikimet e pranuara për vitin 2026.
Sa para janë ndarë për bujqësinë këtë vit?
Programi vjetor për mbështetjen e bujqësisë në Kosovë për vitin 2026 ka një buxhet të përgjithshëm prej rreth 77.5 milionë eurosh.
Nga kjo shumë, rreth 59.5 milionë euro janë paraparë për Pagesat Direkte, 10 milionë euro për Programin e Zhvillimit Rural dhe rreth 8 milionë euro për masat e stabilizimit të tregut.
Mbështetja përmes pagesave direkte përfshin sektorë të ndryshëm, si drithërat, pemëtaria, perimtaria, blegtoria, qumështi, vreshtaria dhe bletaria.
Megjithatë, numri prej 33,460 aplikimesh nuk nënkupton se të gjitha janë miratuar. Përfituesit do të përcaktohen sipas kritereve të programit dhe vendimeve përkatëse të AZhB-së.
Fermerët mund të ndjekin publikimin e listave dhe njoftimet e tjera në faqen zyrtare të Agjencisë për Zhvillimin e Bujqësisë.
