Një monedhë me vlerë nominale prej vetëm 2 eurosh mund të kushtojë mijëra euro në tregun e koleksionistëve. Bëhet fjalë për një monedhë të rrallë të emetuar nga Monako në vitin 2007, në nderim të princeshës Grace Kelly.
Monedha është krijuar për të shënuar 25-vjetorin e vdekjes së princeshës dhe konsiderohet një nga emetimet përkujtimore më të kërkuara të euros.
Sipas njoftimit të publikuar në Gazetën Zyrtare të Bashkimit Evropian, për këtë monedhë ishte paraparë një tirazh maksimal prej vetëm 20,001 ekzemplarësh.
Pikërisht numri i kufizuar i monedhave dhe interesimi i koleksionistëve kanë ndikuar që vlera e saj të rritet ndjeshëm.
Në tregun numizmatik, kjo monedhë përmendet me çmime rreth 3,100 euro, ndërsa vlera reale ndryshon sipas gjendjes, origjinalitetit dhe kërkesës së blerësve.
Në një ankand të dokumentuar në platformën Catawiki, një ekzemplar i vitit 2007, i ruajtur në paketimin origjinal, është shitur për 2,500 euro. Vlerësimi para ankandit ishte ndërmjet 3,200 dhe 3,600 eurove.
Si ta dalloni monedhën e rrallë?
Në njërën anë të monedhës paraqitet portreti i princeshës Grace Kelly, i kthyer nga e majta. Në pjesën e djathtë gjenden mbishkrimi “MONACO” dhe viti “2007”.
Nën flokët e princeshës shihet shenja e autorit të dizajnit, “R.B.BARON”, ndërsa në unazën e jashtme janë vendosur 12 yjet e flamurit evropian.
Ana tjetër e monedhës ka dizajnin e zakonshëm të monedhave 2-euroshe.
Megjithatë, mundësia që kjo monedhë të gjendet rastësisht në kuletë është shumë e vogël, pasi ekzemplarët origjinalë janë shpërndarë kryesisht për koleksionistët dhe zakonisht ruhen në kuti të posaçme.
Çfarë duhet të dini para se ta shisni?
Jo çdo monedhë 2-euroshe e vjetër apo me pamje të pazakontë ka vlerë të madhe.
Çmimi varet nga rrallësia, gjendja fizike, autenticiteti dhe kërkesa në treg. Për këtë arsye, monedhat që dyshohet se kanë vlerë koleksionuese duhet të kontrollohen nga specialistë të numizmatikës.
Ekspertët këshillojnë që monedhat e rralla të mos pastrohen apo lustrohen, pasi ndërhyrjet mund t’ua ulin vlerën.
Në treg qarkullojnë edhe kopje dhe imitime të monedhës me portretin e Grace Kelly, prandaj vetëm ngjashmëria vizuale nuk mjafton për të përcaktuar nëse një ekzemplar është autentik.
