Njëmbëdhjetë zyrtarë të Policisë së Kosovës, përfshirë një toger, janë në prag të suspendimit nga detyra lidhur me trajtimin e rastit të Arlinda Zekajt, e cila u vra më 25 tetor në Vitomiricë të Pejës.
Sipas raportimit të Klan Kosovës, të përcjellë nga Gazeta Demos, Inspektorati Policor i Kosovës (IPK) ka rekomanduar suspendimin e 11 zyrtarëve policorë, të cilët dyshohet se kanë qenë të përfshirë në trajtimin e denoncimeve dhe kërkesave për ndihmë të viktimës.
Vendimi përfundimtar për suspendimin e tyre ende nuk është konfirmuar, ndërsa pritet të merret pas shqyrtimit të rekomandimit të IPK-së.
Ky zhvillim vjen pas nisjes së hetimeve nga Inspektorati Policor i Kosovës lidhur me mënyrën se si zyrtarët policorë kishin trajtuar rastet e raportuara nga Arlinda Zekaj përpara vrasjes së saj.
Më 26 tetor, IPK-ja kishte njoftuar se, me autorizim të Prokurorisë së Shtetit, kishte nisur veprimet hetimore dhe verifikuese për të shqyrtuar ligjshmërinë e veprimeve policore.
Hetimet përfshijnë mënyrën e pranimit dhe evidentimit të denoncimeve, vlerësimin e rrezikut, kohën e reagimit dhe masat që janë ndërmarrë ose që mund të jenë lënë pa u ndërmarrë nga zyrtarët përgjegjës.
Rasti ka marrë vëmendje të shtuar edhe pas publikimit të audioincizimeve të bisedave mes Arlindës dhe një zyrtari policor, ku ajo dëgjohet duke kërkuar zbatimin e një vendimi gjyqësor për mbrojtjen e saj.
Në njërën prej bisedave të raportuara, Arlinda shpreh shqetësimin për sigurinë dhe kërkon ndërhyrjen e Policisë, ndërsa mënyra e komunikimit të zyrtarit policor ka nxitur reagime publike.
Arlinda Zekaj ishte pajisur me urdhër mbrojtjeje dhe kishte raportuar kërcënime përpara se të vritej më 25 tetor.
Zhvillimet e fundit vijnë në ditën kur Këshilli Prokurorial i Kosovës suspendoi edhe kryeprokuroren e Pejës, Lumturije Vuçetaj, dhe prokuroren Arlinda Nallbani-Gacaferri, lidhur me shqyrtimin e trajtimit institucional të rastit.
Hetimet për përgjegjësitë e mundshme institucionale po vazhdojnë, ndërsa rekomandimi për suspendimin e 11 policëve nuk përbën konstatim përfundimtar se ata kanë kryer shkelje.
