Procesi për zgjedhjen e liderit të ri suprem të Iranit duket se po i afrohet fundit, ndërsa një anëtar i Asamblesë së Ekspertëve ka deklaruar se “emri i Khameneit do të vazhdojë” në udhëheqjen e vendit.
Deklarata u bë nga kleriku Hosseinali Eshkevari, i cili tha se vendimi për liderin e ri tashmë është marrë dhe pritet të shpallet zyrtarisht së shpejti nga organet përkatëse të Republikës Islamike.
Sipas raportimeve të mediave ndërkombëtare, ekziston një spekulim i madh se Mojtaba Khamenei, djali i ish-liderit suprem Ali Khamenei, mund të zgjidhet si pasues i tij. Megjithatë, deri më tani nuk është bërë një njoftim zyrtar për emrin e liderit të ri.
Zgjedhja e liderit suprem bëhet nga Asambleja e Ekspertëve, një organ prej 88 klerikësh që sipas kushtetutës iraniane ka kompetencën për të emëruar dhe mbikëqyrur liderin e Republikës Islamike.
Pas zhvillimeve të fundit dhe krizës së sigurisë në rajon, procesi i zgjedhjes së liderit të ri është bërë një nga çështjet më të rëndësishme politike në Iran, ndërsa vendimi përfundimtar pritet të shpallet publikisht në ditët në vijim.
