Futbollisti i Kosovës, Milot Avdyli, është përfshirë në formacionin më të mirë të javës në elitën e futbollit slloven, pas paraqitjes vendimtare me fanellën e Celjes.
Avdyli ishte protagonisti kryesor në fitoren 1-0 të Celjes ndaj Aluminijit, në kuadër të javës së 11-të të kampionatit slloven, duke realizuar golin e vetëm të ndeshjes.
Takimi u zhvillua të shtunën, më 10 tetor, në stadiumin Z’dežele, ndërsa futbollisti kosovar arriti të shënonte që në minutën e 10-të.
Avdyli realizoi me një goditje të ulët nga rreth 15 metra, duke kaluar topin mes lojtarëve kundërshtarë dhe duke e dërguar në rrjetë pranë shtyllës.
Goli i tij rezultoi vendimtar, pasi Celje arriti ta ruante epërsinë deri në fund, pavarësisht rasteve të krijuara nga Aluminiji, që në pjesën e dytë goditi edhe shtyllën.
Paraqitja e mirë e Avdylit është vlerësuar edhe me përfshirjen e tij në 11-shen më të mirë të javës, të publikuar nga kampionati slloven Prva Liga.
Ky vlerësim përbën një tjetër sukses individual për futbollistin kosovar, i cili po vazhdon të kontribuojë me paraqitje të rëndësishme për klubin slloven.
Pas kësaj fitoreje, Celje ka siguruar tri pikë të rëndësishme në kampionat, ndërsa në javën e ardhshme do të përballet me Mariborin.
