Deputetja e Aleancës për Ardhmërinë e Kosovës (AAK), Albana Bytyqi, është parë në shoqërinë e deputetit të Lëvizjes Vetëvendosje, Salih Zyba, pak kohë pasi ky i fundit kërkoi ndërhyrjen e Prokurorisë lidhur me deklaratat e Daut Haradinajt.
Pamjet janë publikuar të enjten, më 15 tetor, nga Nacionale, në një kohë kur deklaratat e Haradinajt për mundësinë e gjakderdhjes në Kuvend më 6 tetor kanë shkaktuar reagime politike.
Më herët gjatë ditës, Zyba kishte kërkuar që Prokuroria të trajtojë informacionet e deklaruara nga Haradinaj lidhur me tensionet gjatë miratimit të ndryshimeve në Ligjin për Gjykatën Speciale.
“Dauti paska folë kogja qartë, tash është koha e Prokurorisë të gjitha këto informacione që ky i paska pasur dhe ditur t’i trajtojë. Dhe rrëfimi kaq i detajizuar a del të jetë plan i tij apo si?”, kishte shkruar Zyba në Facebook.
Reagimi i deputetit të Vetëvendosjes erdhi pasi Daut Haradinaj deklaroi se situata në Kuvend, natën e 6 tetorit, ishte aq e tensionuar sa mund të kishte gjakderdhje nëse nuk do të miratoheshin ndryshimet ligjore për Dhomat e Specializuara.
Deklarata e Zybës ngriti pyetje nëse Haradinaj kishte dijeni për ndonjë plan të mundshëm për dhunë, ndërsa deputeti kërkoi që informacionet të trajtoheshin nga organet e drejtësisë.
Ndërkohë, paraqitja e Albana Bytyqit në shoqërinë e Zybës ka tërhequr vëmendje për shkak se ajo është deputete e AAK-së, subjekt politik të cilit i përket edhe Daut Haradinaj.
Megjithatë, nuk është bërë e ditur nëse dy deputetët kanë diskutuar për deklaratat e Haradinajt apo për ndonjë çështje tjetër politike.
Bytyqi dhe Zyba janë takuar edhe më herët. Në prill të vitit 2021, Zyba kishte konfirmuar publikisht një takim me deputeten e AAK-së, duke mohuar pretendimet e atëhershme se kishte ushtruar presion ndaj saj për votim në Kuvend.
Takimi i raportuar më 15 tetor nuk dëshmon ndonjë koordinim politik mes dy deputetëve lidhur me deklaratat për Daut Haradinajn.
