Njësia për Hetimin e Krimeve Ekonomike ka nisur një aksion në Prishtinë, ku në fokus të kontrolleve janë disa parkingje private, mëson Sinjali nga burime të afërta me rastin.
Sipas informacioneve të para, veprimet hetimore kanë për qëllim verifikimin e mënyrës së funksionimit të këtyre bizneseve dhe respektimin e obligimeve ligjore gjatë ushtrimit të veprimtarisë ekonomike.
Hetuesit pritet të kontrollojnë dokumentacionin e subjekteve, mënyrën e regjistrimit të bizneseve, pajisjet fiskale, deklarimin e të hyrave dhe përmbushjen e detyrimeve ndaj institucioneve përkatëse.
Aksione të ngjashme ndaj parkingjeve private janë zhvilluar edhe më herët në qytete të tjera të Kosovës, ku gjatë kontrolleve janë evidentuar raste të dyshuara për shkelje fiskale, përfshirë mungesë të kuponëve fiskalë, punëtorë të paregjistruar dhe biznese pa dokumentacion të plotë.
Kontrollet ndaj operatorëve ekonomikë synojnë parandalimin e ekonomisë informale dhe sigurimin që aktivitetet private të zhvillohen në përputhje me ligjin.
Në rast se gjatë aksionit konstatohen shkelje, institucionet përgjegjëse mund të ndërmarrin masa administrative ose procedura të mëtejshme ligjore, varësisht nga gjetjet në terren.
Sinjali do të raportojë për çdo zhvillim të ri lidhur me këtë aksion dhe rezultatet e kontrolleve të autoriteteve.
