Deputeti i AAK-së, Daut Haradinaj, ka paralajmëruar protesta dhe bllokada si përgjigje ndaj situatës aktuale politike në Kosovë dhe përplasjes rreth konstituimit të Kuvendit.
Haradinaj ka bërë të ditur se ka nënshkruar një nismë që kërkon zbatimin e vendimit të Gjykatës Kushtetuese, duke kritikuar mënyrën se si po zhvillohet procesi institucional.
Sipas tij, nëse bllokada vazhdon, opozita duhet të kalojë nga deklaratat politike në veprime konkrete në rrugë.
“Protesta, bllokada, do të jenë përgjigjja ndaj Kurtit”, ka deklaruar Haradinaj.
Ai ka akuzuar kryeministrin në detyrë, Albin Kurti, se synon që vendi të shkojë sërish në zgjedhje, duke pretenduar se zgjatja e krizës institucionale është pjesë e një kalkulimi politik.
Haradinaj ka kritikuar edhe opozitën, duke thënë se aktiviteti vetëm përmes rrjeteve sociale nuk është i mjaftueshëm për ta kundërshtuar pushtetin.
“Albin Kurti është frikacak dhe ky s’njeh gjuhë tjetër. Nëse opozita ka menduar që gjashtë vjet që me Facebook me largu z. Kurtin prej Qeverie, atëherë e ka pas shumë gabim”, është shprehur ai.
Deklaratat e Haradinajt vijnë në një periudhë kur Kuvendi vazhdon të jetë i bllokuar dhe partitë politike nuk kanë arritur marrëveshje për vazhdimin e procesit të konstituimit.
Ai ka paralajmëruar se protesta dhe bllokada mund të jenë hapi i radhës i opozitës nëse nuk gjendet një zgjidhje për situatën institucionale.
Haradinaj ka folur edhe për mundësinë e përsëritjes së zgjedhjeve, duke e akuzuar Kurtin se po e shtyn vendin drejt një skenari të tillë.
