Njerëzit e moshës 60 vjeç e lart mund të përballen me rreziqe serioze shëndetësore nga temperaturat e larta në nivele më të ulëta sesa mendohej më parë, sipas një studimi të ri të publikuar në The Lancet Public Health.
Studimi, i udhëhequr nga akademikë të shëndetësisë nga Universiteti Stanford në Kaliforni, ka analizuar mënyrën se si grupmosha të ndryshme përballen me nxehtësinë ekstreme dhe stresin termik.
Sipas gjetjeve, të moshuarit janë veçanërisht të cenueshëm sepse trupi i tyre e ka më të vështirë të përshtatet me temperaturat e larta. Ata djersiten më pak, zemra ngarkohet më shumë dhe enët e gjakut nuk zgjerohen me të njëjtën efikasitet, duke e kufizuar aftësinë e organizmit për t’u ftohur.
Një prej shqetësimeve kryesore është stresi i pakompensueshëm i nxehtësisë, një gjendje në të cilën trupi humbet aftësinë për të ruajtur temperaturën normale. Kjo mund të çojë në probleme serioze shëndetësore, përfshirë komplikime të zemrës dhe, në raste të rënda, vdekje.
Autorët theksojnë se studimet e mëparshme shpesh kanë përdorur të njëjtët pragje të temperaturës për të gjitha grupmoshat. Kjo, sipas tyre, mund të ketë nënvlerësuar rrezikun që paraqet nxehtësia për personat mbi 60 vjeç.
Gjetjet bëhen edhe më shqetësuese në një kohë kur temperaturat globale vazhdojnë të rriten. Sipas parashikimeve të studimit, numri i personave mbi 60 vjeç në botë mund të arrijë në rreth 2.1 miliardë deri në vitin 2050, duke rritur numrin e njerëzve potencialisht të ekspozuar ndaj pasojave të valëve të nxehtësisë.
Studiuesit paralajmërojnë se me çdo rritje të mëtejshme të temperaturave globale, ekspozimi ndaj stresit të rrezikshëm nga nxehtësia do të bëhet më i shpeshtë. Barra pritet të jetë veçanërisht e madhe për të moshuarit dhe për popullsinë në vendet me të ardhura të ulëta dhe të mesme.
Ekspertët e shëndetit kanë paralajmëruar gjithashtu për ndikimin e valëve të nxehtësisë tek personat që kanë probleme ekzistuese shëndetësore. Temperaturat e larta mund të përkeqësojnë sëmundjet e zemrës dhe veshkave, ndërsa dehidratimi dhe kolapsi janë ndër problemet që mund të shfaqen gjatë periudhave të vapës ekstreme.
Një ekspert nga Universiteti Swansea e ka cilësuar studimin si të rëndësishëm, duke theksuar se ndikimi i nxehtësisë nuk është i njëjtë për të gjitha grupmoshat. Sipas tij, të moshuarit mund të jenë në rrezik nga stresi potencialisht fatal i nxehtësisë edhe në nivele të ngrohjes globale ku të rriturit më të rinj përballen me rrezik më të ulët.
Studimi paralajmëron se, nëse ngrohja globale vazhdon me ritmet aktuale, disa zona tropikale dhe subtropikale mund të bëhen gjithnjë e më të vështira për t’u banuar, veçanërisht për personat e moshuar.
