Partia Demokratike e Kosovës i është drejtuar sërish me letër kryesuesit të seancës konstituive të Kuvendit, Avni Dehari, duke kërkuar që vazhdimi i seancës të thirret të enjten, më 20 gusht.
PDK-ja ka kërkuar që seanca konstituive të vazhdojë pa vonesa të mëtejshme, duke e konsideruar këtë si një obligim të kryesuesit të seancës.
Në letrën drejtuar Deharit, deputetët e PDK-së theksojnë se procesi i konstituimit të Kuvendit duhet të përfundojë dhe se deputetëve të zgjedhur duhet t’u mundësohet ushtrimi i mandatit të tyre.
Kjo është hera e dytë që PDK-ja gjatë ditëve të fundit i drejtohet zyrtarisht Deharit me kërkesë për vazhdimin e seancës. Partia opozitare ka kërkuar vazhdimisht që Kuvendi të mblidhet dhe të vazhdojë procedurat për konstituimin e tij.
Moskonstituimi i Kuvendit ka shkaktuar përplasje të vazhdueshme mes partive politike. PDK-ja dhe partitë e tjera opozitare kanë kritikuar mënyrën se si po menaxhohet procesi, ndërsa kanë kërkuar që deputetët të kthehen në sallën e Kuvendit dhe të vazhdojnë punën.
Në anën tjetër, procesi konstituiv vazhdon të jetë i bllokuar, ndërsa partitë politike nuk kanë arritur ende një marrëveshje për të zhbllokuar situatën institucionale.
PDK-ja pritet ta mbajë të njëjtin qëndrim edhe në ditët në vijim, duke kërkuar që seanca të thirret dhe të vazhdojë procedura për përfundimin e konstituimit të Kuvendit.
