Ministri i Jashtëm rus, Sergei Lavrov, ka paralajmëruar NATO-n lidhur me rritjen e aktivitetit ushtarak në Arktik, duke e cilësuar atë si një kërcënim të drejtpërdrejtë për sigurinë e Rusisë.
Në një artikull të publikuar nga Ministria e Jashtme ruse, Lavrov i ka përshkruar stërvitjet dhe aktivitetet ushtarake të NATO-s në Veriun e Largët si “agresive”, duke paralajmëruar se ato mund të rrisin rrezikun e një përplasjeje të armatosur.
Sipas kryediplomatit rus, shtimi i aktivitetit ushtarak në këtë rajon mund të çojë në incidente që rrezikojnë të përshkallëzohen në një konflikt më të gjerë.
“Një aktivitet i tillë ushtarak në Veriun e Largët përbën kërcënim të drejtpërdrejtë për sigurinë e Rusisë. Rreziku i incidenteve që mund të shkaktojnë një konfrontim të armatosur, me pasoja potencialisht katastrofike, është duke u rritur”, ka deklaruar Lavrov.
Deklaratat e tij vijnë pas nisjes nga NATO të misionit “Arctic Sentry” në shkurt të këtij viti. Misioni synon forcimin e pranisë së Aleancës në Arktik dhe në zonat e largëta veriore, në një kohë kur tensionet mes NATO-s dhe Moskës janë rritur ndjeshëm pas luftës në Ukrainë.
Moska e ka kundërshtuar më herët këtë mision, duke e konsideruar praninë e shtuar ushtarake të NATO-s në Arktik si kërcënuese për interesat e saj strategjike.
Arktiku ka rëndësi të veçantë për Rusinë. Vendi ka në këtë rajon një prani të madhe ushtarake, përfshirë nëndetëse të armatosura me armë bërthamore, ndërsa po zhvillon edhe një rrugë të rëndësishme detare për lidhjen me tregjet aziatike.
Ndërkohë, edhe vendet e NATO-s kanë shtuar kapacitetet e tyre në rajon. Norvegjia, e cila ndan kufi me Rusinë në Arktik, ka përforcuar kapacitetet e saj ushtarake në veri, ndërsa Kina ka rritur aktivitetin e saj në një rajon të pasur me burime natyrore, kryesisht në bashkëpunim me Moskën.
Përplasja e interesave në Arktik po merr kështu një dimension të ri strategjik, me Rusinë dhe NATO-n që po rrisin vëmendjen ndaj një rajoni që ka rëndësi të madhe ushtarake, ekonomike dhe gjeopolitike.
Paralajmërimi i Lavrov vjen gjithashtu në një kohë kur NATO ka deklaruar se nuk sheh aktualisht një kërcënim të menjëhershëm për një sulm të drejtpërdrejtë ndaj Aleancës, por vazhdon të forcojë gatishmërinë dhe praninë e saj në rajonet veriore.
