Në ish-objektin e Shkollës Teknike në Obiliq janë zbuluar disa objekte të pazakonta gjatë punimeve të pastrimit, pasi ndërtesa u lirua pas shumë vitesh uzurpimi.
Në bodrumin e objektit janë gjetur thasë të varur dhe një gropë e madhe, duke ngritur dyshime për mundësinë e ekzistencës së një varreze masive nga periudha e luftës në Kosovë. Megjithatë, këto pretendime ende nuk janë konfirmuar zyrtarisht nga institucionet kompetente.
Kryesuesi i Kuvendit Komunal të Obiliqit ka folur për situatën, duke bërë të ditur se autoritetet janë njoftuar për gjetjet dhe se pritet që institucionet përgjegjëse të ndërmarrin veprimet e nevojshme për verifikimin e tyre.
Objekti i ish-Shkollës Teknike në Obiliq ishte mbajtur i uzurpuar për rreth 27 vite pas luftës, ndërsa këtë vit është liruar dhe ka nisur procesi i pastrimit dhe rikthimit në shfrytëzim nga Komuna e Obiliqit.
Gjatë punimeve të mëparshme në këtë objekt ishte raportuar edhe për gjetjen e një ambulance që dyshohej se i përkiste strukturave ilegale serbe.
Institucionet pritet të japin më shumë detaje pas verifikimeve në terren, ndërsa çdo konstatim përfundimtar lidhur me gjetjet në bodrum do të bëhet vetëm pas hetimeve zyrtare.
