Kryeministri në detyrë dhe kreu i Lëvizjes Vetëvendosje, Albin Kurti, ka komentuar deklaratën e deputetit të Listës Serbe, Igor Simiq, gjatë propozimit të kandidatit për nënkryetar të Kuvendit.
Kurti ka thënë se Simiqi nuk e ka lexuar saktësisht propozimin në formën në të cilën e kishte dorëzuar me shkrim.
Deklarata vjen pas përplasjes në seancën konstituive, ku Simiqi, gjatë prezantimit të Slavko Simiqit si kandidat për nënkryetar të Kuvendit, e formuloi propozimin si të bërë “në emër të popullit serb”.
Kjo pjesë e deklarimit shkaktoi reagimin e kryetares së Kuvendit, Albulena Haxhiu. Ajo kërkoi nga Igor Simiqi që ta tërhiqte këtë formulim, duke e cilësuar si të papranueshëm dhe në kundërshtim me Kushtetutën e Kosovës.
Simiqi, ndërkaq, u përgjigj se propozimin e kishte dorëzuar me shkrim, sipas kërkesës së kryesisë së Kuvendit. Pas refuzimit për ta tërhequr deklaratën, Haxhiu ia ndërpreu fjalën.
Çështja është zhvilluar në një seancë të tensionuar, ku deputetët po përballen me mospajtime rreth zgjedhjes së nënkryetarëve dhe mënyrës së votimit për ta. Procesi i konstituimit të Kuvendit ka mbetur i bllokuar prej javësh për shkak të mungesës së marrëveshjes politike.
Deklarata e Kurtit vjen në një moment kur formulimi i përdorur nga Simiqi është bërë pjesë e debatit politik rreth përfaqësimit të komunitetit serb dhe procedurave për zgjedhjen e kryesisë së Kuvendit.
