Deputeti i Lidhjes Demokratike të Kosovës, Ardian Gjini, ka komentuar zhvillimet e fundit në Kuvendin e Kosovës dhe përplasjet rreth zgjedhjes së nënkryetarëve.
Gjini ka thënë se, pavarësisht nëse ekziston apo jo koordinim mes Lëvizjes Vetëvendosje dhe Listës Serbe, veprimet e kësaj të fundit po i shërbejnë, sipas tij, zvarritjes së procesit të konstituimit të institucioneve.
“Me apo pa koordinim, Lista Serbe për të disatën herë po i ndihmon Kurtit për zvarritje. E kemi ditur këtë skenar”, është shprehur Gjini.
Deklarata e tij vjen në një kohë kur Kuvendi po përballet me një tjetër ngërç politik lidhur me zgjedhjen e nënkryetarëve. Përplasjet janë përqendruar edhe te kandidatura e Slavko Simiqit nga Lista Serbe, ndërsa partitë shqiptare kanë paraqitur kandidaturat e tyre për këto pozita.
Debati është zhvilluar edhe rreth mënyrës së votimit dhe formulimit të propozimit të Listës Serbe për nënkryetar të Kuvendit. Këto mospajtime kanë bërë që vazhdimi i procesit të konstituimit të shoqërohet me tensione dhe akuza të ndërsjella politike.
Lista Serbe ka në dispozicion nëntë nga dhjetë ulëset e rezervuara për komunitetin serb në Kuvend, ndërsa një ulëse i takon Nenad Rashiqit. Vetëvendosje ka mbajtur qëndrim kritik ndaj Listës Serbe dhe e ka akuzuar atë për lidhje të ngushta me Beogradin.
Gjini, ndërkaq, e ka interpretuar situatën si një zhvillim që po e zgjat më tej procesin e krijimit të institucioneve të reja, duke paralajmëruar se një skenar i tillë, sipas tij, ishte i pritshëm.
