Deputeti i Partisë Demokratike të Kosovës, Uran Ismaili, ka kritikuar Lëvizjen Vetëvendosje pas zhvillimeve të fundit në seancën konstituive të Kuvendit të Kosovës.
Ismaili e ka cilësuar politikën e Vetëvendosjes si “mashtruese”, duke theksuar se PDK-ja votoi kandidatin e LVV-së për nënkryetar të Kuvendit për t’i hapur rrugë konstituimit të institucionit.
Sipas tij, PDK-ja e mbështeti kandidatin e Vetëvendosjes pavarësisht dallimeve politike, me qëllim që procesi në Kuvend të ecte përpara.
Reagimi vjen pasi Ardian Gola, kandidat i LVV-së për nënkryetar, mori mbështetjen e PDK-së dhe u zgjodh në këtë pozitë. Në anën tjetër, kandidatja e PDK-së, Vlora Çitaku, nuk mori votat e nevojshme pasi nuk u mbështet nga deputetët e Vetëvendosjes.
Pas votimit për Çitakun, deputetët e PDK-së lëshuan sallën, ndërsa seanca konstituive u ndërpre.
Ismaili e ka përdorur këtë situatë për të kritikuar qasjen politike të LVV-së, ndërsa procesi për përmbylljen e konstituimit të Kuvendit vazhdon të jetë temë e përplasjes mes partive.
