Aktorja Monika Lubonja ka reaguar për herë të parë lidhur me materialet intime të publikuara në rrjet, duke bërë të ditur se i është drejtuar drejtësisë dhe se ka ndërmarrë hapa ligjorë ndaj kompozitorit Adrian Hila.
Lubonja ka deklaruar se nuk ka qenë në dijeni se po regjistrohej dhe se nuk ka dhënë pëlqim as për filmimin, as për regjistrimin apo shpërndarjen e materialeve intime.
Ajo ka bërë të ditur se pranë Gjykatës së Shkallës së Parë të Juridiksionit të Përgjithshëm Tiranë është depozituar çështja në të cilën figuron si e dëmtuar akuzuese ndaj Hilës.
Në dokumentin e publikuar prej saj përmenden pretendime lidhur me veprat penale “Fyerja” dhe “Ndërhyrje të padrejta në jetën private”. Pretendimet tashmë pritet t’i nënshtrohen shqyrtimit nga organet kompetente të drejtësisë.
“Nuk kam dhënë pëlqim të filmohem”, ka deklaruar Lubonja, ndërsa ka kërkuar gjithashtu që materialet intime të mos publikohen apo shpërndahen më tej.
Aktorja ka thënë se ndihet e tradhtuar pasi, sipas saj, i kishte dhënë besimin një personi me të cilin kishte pasur një raport personal.
“Kam dashur dikë dhe kam besuar. Nuk turpërohem për dashurinë që kam dhënë”, është shprehur ajo.
Lubonja ka kërkuar edhe nga mediat dhe publiku respektimin e privatësisë së saj, ndërsa ka paralajmëruar se çështjen do ta ndjekë në rrugë ligjore deri në fund.
Rasti vjen disa ditë pasi në internet nisën të qarkullojnë materiale me përmbajtje intime të lidhura me Adrian Hilën. Për rastin janë zhvilluar edhe hetime nga autoritetet.
Hila është marrë në pyetje dhe ka deklaruar se kamerat në ambient i kishte vendosur për arsye sigurie. Ai ka mohuar se kishte shkarkuar materialet dhe ka pretenduar se nuk kishte dijeni për publikimin e tyre në rrjet.
Procedurat dhe hetimet mbeten në zhvillim, ndërsa përgjegjësia eventuale penale mund të përcaktohet vetëm nga institucionet kompetente.
