Deputetja e LDK-së, Adelina Thaçi-Meta, ka reaguar pas zhvillimeve të fundit në Kuvendin e Kosovës, duke adresuar kritika edhe ndaj partisë së saj.
Thaçi-Meta ka thënë se ngjarjet e fundit i ka përcjellë me shqetësim, fillimisht si qytetare, më pas si artiste dhe si përfaqësuese politike.
Sipas saj, është shqetësuese kur shteti trajtohet si një lojë dhe kur interesat personale vendosen përpara interesit të qytetarëve.
Duke iu drejtuar drejtpërdrejt LDK-së, ajo ka bërë të ditur se zhvillimet e mbrëmshme në Kuvend e kanë prekur.
“Zemra më dhembi fort”, ka shkruar Thaçi-Meta, duke theksuar se dashuria për një parti nuk duhet të jetë më e madhe se përkushtimi ndaj parimeve që ajo përfaqëson.
Ajo ka kërkuar më shumë konsistencë në vendimet dhe qëndrimet politike, ndërsa ka kritikuar atë që e ka përshkruar si ndikim të inateve personale dhe pazareve të vogla.
Thaçi-Meta ka paralajmëruar gjithashtu se largimi i njerëzve nga partia mund të ketë pasoja politike, duke kërkuar më shumë afrim dhe reflektim brenda LDK-së.
Në fund të reagimit, ajo e ka uruar presidenten e zgjedhur Justina Shiroka-Pula, duke i dëshiruar shëndet, punë të mbarë dhe forcë për ta përfunduar mandatin me dinjitet.
“Ky popull është lodhur”, ka shkruar ajo, duke kërkuar qetësi, përgjegjësi dhe punë.
Reagimi vjen pas seancës së 6 tetorit, ku Kuvendi miratoi ndryshimet në Ligjin për Dhomat e Specializuara me 88 vota për, ndërsa Shiroka-Pula u zgjodh presidente me 81 vota.
