Kryeministri i Kosovës, Albin Kurti, ka zhvilluar një bisedë me kancelarin gjerman Friedrich Merz gjatë Samitit të Procesit të Berlinit, që po mbahet në Mal të Zi.
Kurti ka publikuar të enjten, më 22 tetor, fotografi nga takimi, duke bërë të ditur se kancelari Merz e ka uruar për mandatin e ri qeverisës.
Në një postim në Facebook, kryeministri ka theksuar rëndësinë e marrëdhënieve ndërmjet Kosovës dhe Gjermanisë, duke veçuar investimet gjermane dhe bashkëpunimin ekonomik.
Sipas Kurtit, investimet e drejtpërdrejta gjermane në Kosovë kanë arritur në rreth 1.5 miliardë euro, ndërsa 62 për qind e kësaj shume është investuar gjatë pesë viteve të fundit.
Ai ka vlerësuar se ekziston potencial i madh për investime të tjera në industri, energji, transport, teknologji të informacionit dhe komunikimit, si dhe arsim profesional.
Kryeministri ka njoftuar gjithashtu se Prishtina do të jetë nikoqire e Forumit të tretë Ekonomik Gjermano-Kosovar, që do të mbahet më 28 dhe 29 tetor 2026.
Forumi do të organizohet në Hotel Emerald, me pjesëmarrjen e bizneseve, investitorëve dhe përfaqësuesve institucionalë nga të dyja vendet.
Kurti vlerëson rolin e Gjermanisë në Procesin e Berlinit
Duke folur për Procesin e Berlinit, Kurti ka kujtuar se kjo nismë u themelua nga Gjermania në vitin 2014, me qëllim të forcimit të bashkëpunimit ndërmjet gjashtë vendeve të Ballkanit Perëndimor.
Sipas tij, përmes këtij procesi janë arritur marrëveshje të rëndësishme, përfshirë ato për udhëtimin me letërnjoftime dhe njohjen e diplomave.
Kurti ka theksuar se Kosova i ka zbatuar marrëveshjet e nënshkruara dhe ka kërkuar që të njëjtën gjë ta bëjnë edhe vendet e tjera të rajonit.
“Të gjithë duhet të bëjnë të njëjtën gjë, sepse askush nuk mund ta mbajë peng rajonin”, ka shkruar Kurti.
Ai ka përmendur edhe vendimin e Bundestagut gjerman për vazhdimin e pranisë së ushtarëve gjermanë në Kosovë në kuadër të KFOR-it.
Më 11 qershor 2026, Parlamenti gjerman kishte miratuar vazhdimin e mandatit të Bundeswehr-it në KFOR për një vit tjetër, duke ruajtur mundësinë e angazhimit të deri në 400 ushtarëve.
Në përfundim të postimit, Kurti ka falënderuar kancelarin Friedrich Merz për mbështetjen ndaj Kosovës, duke theksuar rëndësinë e Gjermanisë për perspektivën evropiane të vendit.
