Një aksident i pazakontë ka ndodhur në Francë, ku një autobus dhe një makinë kanë përfunduar në lumin Sena në zonën Juvisy-sur-Orge, në jug të Parisit.
Sipas autoriteteve franceze, autobusi i drejtuar nga një shofer në trajnim humbi kontrollin, goditi një veturë të parkuar dhe më pas të dy mjetet ranë në lumë. Në autobus ndodheshin katër persona, përfshirë shoferen, instruktorin dhe dy pasagjerë, të cilët u shpëtuan të gjithë pa lëndime serioze falë reagimit të shpejtë të ekipeve emergjente.
Shërbimet e emergjencës, përfshirë zhytësit dhe njësitë e shpëtimit, intervenuan menjëherë për të siguruar zonën dhe për të kontrolluar nëse kishte viktima të tjera. Fatmirësisht, makina e përfshirë ishte e zbrazët në momentin e aksidentit.
Autoritetet kanë nisur hetimet për të përcaktuar shkaqet e plota të incidentit, ndërsa aksidenti ka shkaktuar ndërprerje të përkohshme të trafikut dhe transportit publik në këtë zonë.
