Një hetim i publikuar nga “The Telegraph” ka ngritur pikëpyetje të reja rreth periudhës së Gianni Infantinos në UEFA, pas raportimeve se një ish-punonjëse e organizatës ka marrë një pagesë mbi 150 mijë paund për largimin e saj nga institucioni.
Sipas raportimeve, pagesa përfshinte edhe mbështetje financiare për një program MBA dhe u bë pasi ish-punonjësja u largua nga UEFA në vitin 2011.
UEFA ka konfirmuar se një pagesë është bërë ndaj një ish-punonjëseje dhe ka bërë të ditur se rregulloret e saj janë ndryshuar ndër vite për të reflektuar standardet e një organizate moderne.
Pas publikimit të këtyre pretendimeve, UEFA po shqyrton mundësinë e nisjes së një hetimi për sjelljen e Infantinos gjatë periudhës së tij 16-vjeçare në organizatë.
Infantino, i cili më pas u zgjodh president i FIFA-s, është përballur edhe më herët me polemika të ndryshme gjatë karrierës së tij në drejtimin e futbollit ndërkombëtar.
