Deputetja e LDK-së, Vjosa Osmani, ka deklaruar se Grupi Parlamentar i LDK-së po zhvillon një mbledhje për të diskutuar zhvillimet e fundit politike në vend. Ajo ka bërë të ditur se pas përfundimit të takimit do të publikohet një qëndrim i përbashkët i deputetëve të kësaj partie.
Osmani tha se mbledhja është takim i rregullt i grupit parlamentar dhe se në të do të trajtohen zhvillimet e fundit politike, veçanërisht situata e krijuar në Kuvend.
“Është takimi i grupit parlamentar, natyrisht për zhvillimet e fundit. Sapo të përfundojë takimi do të kemi deklaratë të përbashkët”, ka deklaruar ajo.
E pyetur për qëndrimin e LDK-së lidhur me zhvillimet në Kuvend dhe mungesën e deputetëve të saj në seancën e djeshme përkrah PDK-së dhe Aleancës, Osmani tha se LDK-ja ka qenë në Kuvend.
Ajo theksoi se qëndrimi i partisë lidhet me mbrojtjen e Kushtetutës.
“Çdo ditë jam në Kuvend. Çdo ditë jam në Kuvend. Edhe sot isha në Kuvend. Ne jemi në përkrahje të mbrojtjes së Kushtetutës”, u shpreh Osmani.
Deklarata e saj vjen në një periudhë të tensionuar politike, ku partitë parlamentare kanë qëndrime të ndryshme për mënyrën e vazhdimit të punës së Kuvendit dhe tejkalimit të ngërçit institucional.
LDK-ja pritet që pas përfundimit të mbledhjes së Grupit Parlamentar të dalë me një qëndrim më të detajuar për zhvillimet e fundit dhe hapat që do të ndërmarrë.
Osmani konfirmoi se ky qëndrim do të bëhet publik menjëherë pas përfundimit të takimit të deputetëve të LDK-së.
