Gjatë vitit 2025, një pjesë e madhe e lindjeve në spitalet publike të Kosovës janë kryer me prerje cezariane, sipas të dhënave të Shërbimit Spitalor Klinik dhe Universitar të Kosovës (SHSKUK).
Nga gjithsej 16 mijë e 923 lindje të realizuara në institucionet publike shëndetësore, 6 mijë e 789 prej tyre janë kryer me prerje cezariane, që përbën rreth 40 për qind të numrit të përgjithshëm të lindjeve.
Të dhënat tregojnë se ndërhyrjet me operacion vazhdojnë të përbëjnë një pjesë të konsiderueshme të lindjeve në Kosovë, ndërsa numri i tyre ka qenë temë diskutimi edhe më herët nga profesionistët shëndetësorë.
Prerja cezariane është një ndërhyrje kirurgjikale që kryhet kur ekzistojnë arsye mjekësore për të mbrojtur shëndetin e nënës ose foshnjës, por mjekët kanë paralajmëruar se përdorimi i saj pa nevojë mund të sjellë rreziqe dhe komplikime shëndetësore.
Sipas raportit të punës së SHSKUK-së për vitin 2025, gjatë këtij viti janë regjistruar gjithsej 16 mijë e 923 lindje në kuadër të spitaleve publike, ndërsa përveç lindjeve janë kryer edhe mijëra procedura dhe ndërhyrje të tjera mjekësore në institucionet shëndetësore publike.
Krahasuar me vitet paraprake, përqindja e lindjeve me prerje cezariane ka mbetur në nivele të larta. Në vitin 2024, në SHSKUK ishin realizuar mbi 17 mijë lindje, ku rreth 39 për qind ishin kryer me operacion.
Ekspertët shëndetësorë vazhdimisht theksojnë rëndësinë e vlerësimit individual të çdo rasti, duke kërkuar që vendimi për prerje cezariane të merret vetëm kur është i nevojshëm dhe në interes të sigurisë së nënës dhe fëmijës.
